UTAMBULISHO WA TANZANITE FOUNDER FOUNDATION (TAFFO) KATIKA SIKU YA MAAZIMISHO YA MIAKA 46 YA UVUMBUZI WA MADINI YA ZOISITE INAYOJULIKANA LEO HII KAMA TANZANITE.

Mwenyekiti wa TANZANITE FOUNDER FOUNDATION, Bi. Asha Ngoma akionyesha cheti cha Uvumbuzi kilichotolewa na serikali mwaka 1984, mbele ya waandishi wa habari, katikati ni Mzee Jumanne Mhero Ngoma, Mvumbuzi wa madini ya Tanzanite, Kulia ni Bw. Baraka Msuya, Mjumbe wa taasisi.

Mwenyekiti wa TANZANITE FOUNDER FOUNDATION, Bi. Asha Ngoma akikifanunua jambo kuhusu shughuli za taasisi akiwa pamoja Mzee Jumanne Mhero Ngoma, Mvumbuzi wa madini ya Tanzanite na Bw. Baraka Msuya, Mjumbe wa taasisi.

Mwenyekiti wa TANZANITE FOUNDER FOUNDATION, Bi. Asha Ngoma akionyesha cheti cha maabara ya madini  kilichotolewa mwaka 1967, mbele ya waandishi wa habari, kinachoonyesha ni madini pekee Duniani

Asasi mpya ya kiraia inayojulikana kwa jina la TANZANITE FOUNDER FOUNDATION, kwa kifupi “TAFFO”, Yatambulishwa rasmi mjini Dar Es Salaam,  ambayo Mvumbuzi wa madini ya Tanzanite ni mmoja wa waanzilishi wake.

TAFFO ni asasi isiyo ya kiserikali itakayojishughulisha na wachimbaji wadogo wadogo wa madini vijana, wanaofanya shughuli za madini yote yanayopatikana ndani ya nchi yetu ya Tanzania yakiwemo TANZANITE.

Malengo makubwa ya asasi hii ni:

·       Kuwawezesha vijana kupata utaalam (elimu) katika sekta ya madini.

·       Kuwawezesha kupata nyenzo za uchimbaji madini kutoka vyanzo mbali mbali ikiwemo Serikali, mashirika ya ndani na nje ya nchi, Asasi, mabenki na Mtu mmoja mmoja atakayeguswa na huduma za asasi hii.

·       Kuenzi na Kuhifadhi historia ya uvumbuzi wa madini ya TANZANITE kwa faida ya vizazi vya sasa na vijavyo.

Leo katika historia ya Tanzania tar 23/9/1967 siku kama ya leo, miaka 46 iliyopita ndio siku ambayo yalivumbuliwa madini ya Zoisite ambayo kwa leo yanajulikana kama “TANZANITE” yanayo patikana nchini Tanzania pekee, duniani.

Mzee Jumanne Mhero Ngoma (Mvumbuzi) wa madini haya ya Tanzanite, alizaliwa mwaka 1939 katika kijiji cha Marwa wilaya ya Same mkoani Kilimanjaro

Wazazi wake walikuwa wafugaji wa Ng’ombe na mbuzi hivyo waliishi maisha ya kuhamahama ili kupata malisho bora ya mifugo kama ilivyo hulka na tabia za wafugaji.

Wakati akiendelea na shule ya msingi,  mwaka 1952 wazazi wake walihama kutoka Hedaru na kwenda kuishi Mererani. Mzee Jumanne Mhero Ngoma, aliweza kusafiri na wazazi wake hadi Mererani, akaendelea na masomo yake katika shule iliyokuwa ikiitwa Town School iliyopo Arusha mjini, ambako ilibidi akae na mjomba yake Bw. Ruben Mkali aliyekuwa akiishi Arusha Mjini wakati huo.

Mzee Jumanne Ngoma alijiunga na kozi fupi ya madini iliyokuwa ikitolewa na Wizara ya Madini wakati huo. Baada ya kumaliza kozi ya madini katika ofisi ya madini Morogoro, Juni 1, 1966 alipata leseni ya madini baada ya kuhitimu mafunzo hayo.

Siku chache baada ya kumiliki leseni ya utafiti wa madini, Mzee Jumanne Mhero Ngoma alirejea nyumbani kwake Makanya.

Alipokuwa Makanya aliamua kuanza utafiti wake kijiji chake cha Makanya. Mzee Ngoma aliaza shughuli za utafiti wa madini, ndipo akagundua Madini ya Gypsum, na kuwa mtu wa kwanza aliyegundua Gypsum maeneo ya kijiji cha Makanya, sasa hivi eneo hilo linaitwa Chang’onko

Hivyo alipopata elimu hiyo ya madini aliamua kwenda Meralani, katika eneo la Lalouo kijiji cha Naisunyai kufanya utafiti wa yale mawe aliyoyaona wakati anachunga mifugo ya baba yake. Mwaka Januari, 1967 aliamua kuyapeleka mawe yale katika ofisi ya madini Moshi kwa uchunguzi. Alishauriwa na afisa wa madini kipindi hicho Mr. Bills, ofisi ya madini Moshi itayapeleka kwenye maabara ya taifa Dodoma kwa uchunguzi zaidi.

Ndugu waandishi wa habari, Mnamo tarehe 23 Septemba 1967 maabara ya Dodoma  ilithibitisha kuwa ni madini ya Zoisite ambayo kwa wakati huo hayakuwa na soko, lakini wakashauri huenda ya kawa na soko siku zijazo.

Mnamo Mwaka 1984, serikali ya Jamhuri ya muungano ilipotambua rasmi Mvumbuzi ya madini hayo na kuyapa jina la “TANZANITE” na kumtunukia cheti cha uvumbuzi katika sherehe ya siku ya wafanyakazi zilizofanyika mkoani Mbeya